【Viu】Martin王智騫、Phil林奕匡同太太李靄璣噚晚出席時裝雜誌頒奬禮活動。包到冚出現嘅Martin，原來日前唔小心仆落樓梯，撞傷咗個靚仔樣同隻眼呀，搞到全程戴口罩示人，心痛死小編同佢現場一大班Fans呀！不過Martin果然乖乖，佢承認因為掛住做低頭族唔睇路所以撞親，佢笑言：「事後公司都有『關心』我，哈哈……我以後一定會睇路，好彩唔太影響到之後嘅工作。」
同場嘅林奕匡伉儷啱啱慶祝完木婚，春宵一刻值千金，問到佢哋有冇喺呢個浪漫嘅氛圍下造人？林太笑言：「要努力啲！（即係平時唔努力？）我哋都好鍾意小朋友，但因為疫情關係，令計劃推遲咗，依家係時候要諗。其實我思想都新潮，從來唔覺得一定要生小朋友，可以領養㗎嘛！」而Phil就坦言屋企人有催生，佢話：「係有催我，佢唔知㗎！如果可以生兩個固然開心，因為兩個有得陪玩。」老婆Rikko就反應好大喇！「我作為生嗰個，真心唔應該俾壓力我，因為我都未生，我又點知生完之後，我係唔係享受呢？所以我認為生完一個先再決定。」
