【Viu】MC張天賦同Kaho洪嘉豪二度encore順利完成尾場九展騷，連續三晚用舞技炸爆舞台，睇到全場fans都熱血沸騰！頭場MC爆Kaho練舞練到黑面，Kaho解釋係怕自己handle唔到啲舞步唔開心啫，仲講到明下次再挑戰！而自爆跳到想發脾氣嘅MC就透露整緊跳舞快歌，對於尾場跳Solo，佢話中獎畀幸運女神恥笑，唔記得啲step就freestyle。
講到Kaho只喺第二場揭起件衫派「福利」，佢笑話係全場加MC慫恿佢咁做，又承諾或會喺稍後各自嘅個人騷上露兩手！嚟到各位「院友」同「賦二代」最關心嘅一part，就係究竟幾時公布個人騷詳情？佢哋大賣關子，只預告將會喺今年內成事，視今次呢個騷為熱身，問到係咪進軍紅館？MC即刻倒抽一口涼氣咁款兼眼神求救：「係大型演唱會，夠坐嘅⋯」答案呼之欲出咁喎！
