【Viu】 林家謙處男紅館個唱噚晚嚟到第六場，第一位嘉賓竟然係「林家犬」Waffle Cute爆登場，陪住家謙繞場唱歌，歌迷梗係興奮到嗌爆紅館啦！不過Waffle一啲都冇怯場，淡淡定咁跟著主人邊唱邊跳，真係好「打耳」啊！除咗愛犬之外，當然唔少得老友Serrini同埋噚晚驚喜現身嘅Tyson Yoshi啦！Serrini仲好搞笑咁叫Tyson幫佢報仇，夾手夾腳一齊除家謙件衫，結果家謙失守露出一邊麒麟臂！咁都未止啊，Serrini仲爆大鍋，懷疑家謙同Tyson有超友誼關係！其實噚晚呢場騷本應係尾場，不過因為打風而變成「尾二」場，所以家謙呢晚為歌迷準備咗一個壓軸嘅越洋大炸彈，就係同身處台灣嘅林宥嘉現場連線，合唱由家謙為Yoga作曲嘅《壞與更壞》，超正啊！
