【Viu】3年前跳到幕前以歌手身份出道嘅林家謙，迎嚟首個紅館演唱會，Stephy鄧麗欣、Jay Fung、Cloud、艾粒、森美等到場支持，家謙家人、張敬軒、古巨基、草蜢、鄭中基、容祖兒、鄭欣宜等就分別送上花籃祝賀。噚日頭場座無虛席，全場震撼嘅呼吸聲簡直係由頭帶到落尾，超有氣氛！家謙一嚟就晒琴技，自彈自唱《一人之境》打開序幕，令fans聽出耳油！整晚又換上多套靚衫，貼心照顧埋視覺嘅享受！
嘉賓方面亦陣容鼎盛，軒仔一出場全場即陷入瘋狂狀態，自嘲驚戴眼鏡就會同家謙撞樣，又數番自己上年開騷，就係因為家謙帶頭送禮做壞規矩，所以！軒仔決定禮尚往來，喺金庫挑選咗部殿堂級錄音器材割愛送贈，背後仲有個故事添！接住落嚟家謙理應要落台換衫，點知突然撒嬌say no，最後就即興同軒仔再jam多首《笑忘書》。另外嘅嘉賓就仲有老友「樹妮妮」Serrini、JNYBeatz、隔空合唱嘅Jace陳凱詠等。
而演唱會去到尾聲嗰陣，家謙哽咽咗三次，更自爆細個會因為唔捨得假期完而喊嘅瘀事，到長大發現唔係所有嘢都可以encore，有啲嘢帶住遺憾、失落先會深刻記得，並以「希望大家記得今年夏天，一齊喺度相聚過」作結。
