【Viu】由子華神、潘燦良主演嘅40場舞台劇《最後禮物》因疫情關係延期6個月，噚晚首場正式公演，子華神同潘燦良飾演一對闊別多年嘅兄弟，因為爭奪家產而重遇，兩兄弟連場唇槍舌劍、針鋒相對鬧交，過程大玩黑色幽默對白，觀眾笑到拍爛手掌！謝幕時子華神好識撈多謝老闆楊受成先生，解釋疫情下知道好多舞台劇冇咗就係冇咗，非常陰公，全靠實力雄厚嘅楊生先可以安排重演40場。潘燦良亦好感謝觀眾們一直堅持等待：「身邊冇人話退飛，佢哋話死都揸住張飛，等到演到果日為止！」
噚晚首場吸引到劉嘉玲、林嘉欣、蘇玉華、佘詩曼、毛舜筠、許靖韻等到場欣賞，嘉玲姐自爆有戲癮又係舞台劇發燒友，所以專程到場偷師學習，將來有合適劇本都會再踏舞台。老公偉仔就忙於拍攝NETFLIX電視劇，講笑話自己幫對方打雜，負責處理機票住宿等事項：「劇本留俾佢睇，我剩係push咗佢拍《尚氣》，因為我係MARVEL迷！」近年長駐內地嘅嘉玲姐解釋好怕隔離因而沒有兩地飛，今次帶母親回港預計逗留一段時間，需要處理業務。毛姐包紥了左腳腳踝帶傷到場，佢解釋係跳繩整傷，仲話因為自己唔聽囡囡話搞成咁，之後會帶埋囡囡一家人支持MIRROR演唱會，而自己套《阿媽有咗第二個》上映在即，透露之前已經睇咗好多次，好戥大家期待！
