【Viu】由古天樂、劉嘉玲同「黑哥」姜皓文主演嘅港產科幻片《明日戰記》成為《國際電影節》嘅開幕電影，古仔受訪時激罕變「開籠雀」，仲自誇最近多做訪問令國語好咗，連嘉玲姐都激讚佢呀，莫非「港普之父」地位想讓畀保錡？古仔話拍《明》片好辛苦，單係件衫都30幾磅，除衫去廁所都要用9個字，加上拍攝時正值炎夏，熱到痴線；黑哥都因為要戴頭套搞到生頭瘡呀！
郭富城連續4年擔任「國際電影節大使」，由城城同梁朝偉主演嘅《風再起時》亦成為開幕電影。城城話最難係由後生演到老，加上會跳拍，只得3、4日減返老年版嘅肚腩，全靠食得清淡同做運動。
講到MIRROR演唱會嘅舞台安全令大眾關注，城城身為「舞台王者」，當然大方分享經驗，佢話以前會喺Studio搭實景舞台嚟踏台，確保整個流程順暢同安全，亦覺得只得兩日時間入台未必足夠。城城話歌手要全神貫注演出，舞台機關需要監製同團隊溝通，祝願所有台前幕後都平安順利。另外，講到林志穎出車禍，城城話每日都有留意新聞，但現階段唔適宜騷擾小志，希望佢早日康復，相信小志可以好快同大家見面！
