【Viu】距離MIRROR紅館演唱會仲有兩個禮拜，Jer柳應廷噚晚推出今年第二部曲新歌《自毁的程序》，見到MV裡面有好多得意角色，呢位柳三歲都想演埋一份，「今次MV幾好玩，因為好多得意元素，好似跳咗入仙境，遇見三個精靈，然後又會有藝伎出現，穿梭於京都與奈良之間。我幾鍾意古靈精怪嘅得意故事，所以我好Enjoy拍MV，但好可惜做唔到佢哋，我好恨可以做啲精靈跳嚟跳去，咁就可以超級多人注意。」講到今次MV嘅拍攝場景，Jer就話好鍾意呢場行人隧道雪景，「之前MIRROR《12》嘅MV已經玩過，都見識過個靚，所以一講話拍雪景，就算明天會整污糟個頭我都Keep噴雪效果，因為畫面上一定呈現到靚，但靚嘅背後我要閉氣，同埋啲雪會吹入眼球、鼻孔，但出到嚟畫面靚就OK啦！」
而編曲方面，《自毁的程序》都繼《離別的規矩》出現洞蕭、笛等亞洲樂器後，今次都特登加入另一種亞洲樂器：「一彈個樂器，就會Feel到首歌嘅vibe（氛圍 ）。」另外，Jer仲有劇透第三部曲嘅線索，叫大家記得留意第三段副歌：「Chrous 3蘊含好多圖片，同時亦有嚟緊第3首歌嘅線索喺入面，如果想估下第3首歌係咩畫面，就可以留意Chorus 3。」
