【Viu】今日毛姐毛舜筠、Ronald鄭中基出席電影《死屍死時四十四》開鏡拜神，二人多次合作，默契十足。Ronald話今次都好開心，雖然二人來自唔同家庭，但都有對手戲，同心合力做好一件事。而毛姐之前因熔斷機制幾經波折先返到香港開工，辛苦到極，佢話：「本身改1月拍，但我返唔到嚟，Ronald個期一直hold咗出嚟，佢哋都肯等我，點知返到嚟香港又好危險喎，所以等安全先開到工。」
問到同Edan、Jer開工，朋友會唔會追問攞Mirror演唱會飛呢？Ronald話：「我都知大家會問，所以喺佢哋未問前已講咗話冇。」而毛姐就話：「你點問我都冇啦，我又唔係主辦單位，但花姐好好，問我想睇邊場，我話梗係想睇晒啦！不過啲仔（姜濤、Edan、Jer）好好，佢哋都問我想唔想睇，但我依家一張都未有㗎！」
