【Viu】 MIRROR成員AK同Alton嘅合唱歌《Rebound》上架一個月多啲，點擊已經成273萬，成績相當唔錯，而MV花絮亦陸續上架，今朝凌晨又有片睇啦！要喺MV化身Party People嘅AK同Alton，搵嚟唔少圈中朋友撐場客串，佢哋仲自稱非常「疊馬」添，又係嘅，除咗兄弟Lokman同Frankie，仲有洪嘉豪、Yanny陳穎欣、梁祖堯、KB同On仔等等，真係好「疊馬」喎，而KB當晚就算唔陪老婆慶祝生日都要嚟幫手，認真唔話得！但最搞笑嘅就係On仔嘞，喺拍攝空檔突然演小劇場，用最後一口氣叫Alton下次記得自己出solo，仲話AK已經好多solo，真係笑死啊！
