【Viu】楊梓菁（原名楊柳青）加盟新公司哲星匯文化娛樂，今日喺尖沙咀出席簽約儀式，仲得到伯樂梅小青撐場。楊梓菁話今次簽新公司，主力會以拍電影為主：「未簽約之前，已經拍咗佢哋一套戲做女主角，因為咁而識咗老闆。老闆好好，除咗會開戲畀我，仲已經幫我傾咗一個國際珠寶品牌代言人。」以打女見稱嘅楊梓菁，表示未來除咗拍動作片外，仲希望可以拍愛情片：「想畀大家睇到我柔情一面，所以愛情、溫情電影都想試，最想就係可以同彭于晏拍愛情片，另外唔同電視台都open嘅，自己最想試綜藝節目，可以畀大家睇到我最真實嘅一面。」問到今次係咪因為加盟新公司而改名？楊梓菁表示其實一直以嚟都有好多人叫佢改名，咁啱簽新公司，所以改埋名就有個新開始。
