【Viu】《夜王》噚晚特別舉行「東日開運元宵春茗」，導演吳煒倫、黃子華、Sammi鄭秀文、Dee哥何啟華、王丹妮、李芯駖、阿卵楊偉倫、小野盧鎮業、楊偲泳等熱鬧開live，同場更特邀蘇民峰師傅妙論各位嘉賓馬年運程。有網民要求若《夜王》票房破億，希望聽到子華演繹Sammi首《星秀傳說》 [Shine一次 Version] 作回禮，而導演就透露《夜王》原聲大碟正籌備中，子華表示：「好高興聽到佢哋已經做緊（隻碟），完全知道係冇預我，唔好俾我搞散！」
事後子華又笑稱：「因為數字靚，我哋先可以聚埋搞春茗，如果冇數字，大家就會各散東西見唔到人。」Sammi又特別感激「歡哥」：「我俾咗子華一個綽號叫『燈塔』，佢唔止自己發光，仲令側邊啲人都一齊發光 ，佢喺歷史裏面係好獨特嘅存在。」子華神都認同：「又真係喎！拍咗《飯戲攻心》同《毒舌大狀》，都有一班新演員廣為大家熟悉，甚至一齊合作完又攞最佳女主角，但更加重要嘅係跟住要有機會，所以希望容許我哋開多啲戲，大家多啲入場，令新人有更多機會俾大家睇到。」
導演就笑言想原班人馬拍喪屍片：「首先未知邊位係喪屍、邊個係人類，子華話想俾喪屍咬，但點知佢一嚟就可能係喪屍。」而「土地」同「太子峰」嘅討論熱度一直居高不下，阿卵坦言受寵若驚：「大家都似乎好鍾意嗰啲對白、鞠躬，而家仲叫做『土地跳』，咁梗係好開心啦！」化身戲中唯一大反派嘅小野呢晚都再表演越南話，成功呃like！而「葵芳」蔡蕙琪亦一片成名，蘇師傅仲提醒佢唔好揸車添！葵芳笑指：「我考咗三次車牌，第三次先合格，所以我今年唔揸車，搭地鐵啦！多啲去葵芳站，我諗我運程應該會好啲！」另外截至今午，港澳票房已突破7777萬，想知就睇現場實況片啦！
