【A&M Diary】話說，小學一年班英文老師叫每個同學返去諗個英文名，而M媽就求其列咗十幾廿個英文名我揀，就係咁我就成為咗M佬。如果當時M媽識Francesco呢個意大利名，我係唔係就會成為F佬？食意粉多過食飯？好啦，發完夢啦！無人叫你改名，今日只係去大角咀The Francesco，試下呢間隱世意大利餐廳，聽講好正宗！
凱撒沙律
頭盤食返嗰凱撒沙律，開開胃先！沙律菜新鮮爽口，麵包粒仲係微暖，口感豐富。平時食凱撒沙律成日都要問餐廳追加芝士粉，呢度嘅凱撒沙律食到最後一啖都仲有濃厚嘅芝士味，誠意十足！
白酒蜆肉意粉
有睇開我哋A姐M佬介紹嘅字母粉應該都會留意到我哋最愛嘅意粉就係白酒蜆肉意粉！蜆肉大大隻，非常鮮甜，白酒味香濃，吊起蜆肉鮮味，不得不提嘅係佢地嘅意粉非常al dente！
蒜蓉炒蘑菇
大廚用上蒜蓉作為基調，並配上牛油嚟炒。炒過嘅蘑菇充滿蒜蓉同牛油味，惹味而不油膩。
牛油刺山柑醬烤鱸魚
鱸魚烤得十分出色，外層魚皮烤到非常香脆，魚肉肉質仍然保持嫩滑！加分位絕對係特製嘅牛油刺山柑醬莫屬，越食越開胃，同鱸魚好夾，再加上綿滑嘅薯蓉，非常滿足！
