【A&M Diary】呢間位於大角咀嘅大丸ラーメン，除咗好味，仲好養眼㗎，因為個日籍老闆兼廚師好靚仔㗎！其實都係因為M佬鍾意食拉麵，我先帶佢嚟呢間日本人主理嘅拉麵小店囉！入到嚟大丸ラーメン，除咗播放日文歌，裝修擺設充滿和風之外，店員同老闆都係用日文溝通，真係重拾久違嘅日本旅行呀！
白丸
M佬叫咗白丸，白丸其實係鹽味豬骨湯底拉麵。餐牌寫上加入喜馬拉雅山、意大利同埋沖繩嘅鹽，雖然食嘅時候，我真係唔識分辨喜馬拉雅山、意大利同埋沖繩嘅鹽，但湯底真係好有層次！首先用豬骨熬製嘅湯底非常濃厚但又唔油膩，之後就會感受到淡淡嘅海鹽味，另外落單時記住加埋醃檸檬，令成個湯底更清爽。另外，M佬就揀咗粗麵，粗麵相對軟腍，而配料有叉燒、溏心蛋、紫菜、木耳同蔥花。
辛丸
顧名思義，辛丸即係辛辣湯底，湯底同樣用上無添加味精嘅豬骨濃湯，而我揀咗中辣，越食越辣，好過癮呀！我特登揀幼麵，因為掛湯比粗麵更強，條條拉麵都掛上辣汁，好好味。同樣地配料有叉燒、溏心蛋、紫菜、木耳同蔥花，特別鍾意佢嘅叉燒，雖然係薄切，但因為用火槍燒過，令叉燒嘅油份迫出，食嘅時候充滿焦香味，但又唔會有油膩感。
