【A&M Diary】深水埗有好多茶餐廳同小店選擇，大部份都主打經濟實惠。今日同A姐去深水埗買電腦，本身諗住食碗車仔麵或油渣麵醫肚就算，但行過竟然見到有間拉！麵！店！真係估唔到深水埗區都有間有質素嘅拉麵店，價錢仲要唔算貴。呢度主打四款拉麵，有原味、黑蒜、辛辣同海老拉麵，一於去試試。
海老火炙叉燒拉麵
A姐揀咗海老火炙叉燒拉麵，一開始就當然試下嗰湯先，豬骨湯濃郁得嚟唔油膩，鮮甜美味，加埋免治豬肉碎，肉味香濃。拉麵仲有櫻花蝦，蝦味凸出。火炙叉燒肥瘦比例啱啱好，外面微微燒焦，香口惹味。配料仲有椰菜同木耳，非常滿足。拉麵軟韌啱啱好，入口彈牙，掛湯力高。
辛辣厚切叉燒拉麵
我就揀惹味啲嘅辛辣厚切叉燒拉麵，火紅嘅湯底都幾辣，超級惹味，加埋紅椒、肉碎、黑木耳絲同蔥粒，味道豐富。叉燒醃得入味，肉質嫩滑，肉味香濃。
薯片雞翼
外皮炸到脆卜卜，加埋薯片，更加脆口，雞翼肉仲保持到肉汁，嫩滑juicy，正！
