【A&M Diary】深水埗對於好多女仔嚟講，絕對係超容易盪失路嘅熱點，唔知你有無同感呢？話說A姐我有一日因為要去深水埗買嘢，喺唔識路嘅情況之下，依稀記得經過一間懷舊茶記，門口大大隻寫住「馳名蛋牛治」！但嗰日趕時間，所以無停低食下午茶。當隔咗一段時間之後，我嘅記憶只係剩返懷舊茶記，次次特登去搵但都搵唔翻！今日嚟到深水埗，我已經完全無咗呢回事，偏偏新香園大大隻寫住嘅「馳名蛋牛治」終於喺我面前再次出現，不過因為疫情無開門，好彩原來附近開咗新香園嘅分店，一於試試！
馳名蛋牛治烘底
新香園分店環境好啲，價錢都會貴少少；另外因為新香園分店個廚房大啲，所以推出唔少總店無嘅食物。不過，作為第一次嚟新香園，就梗係要試吓最基本嘅馳名蛋牛治啦！本身我冇諗過要烘底，但店員極力推薦，原來真係有驚喜！首先烘過嘅麵包夠香脆，而炒過嘅蛋牛又嫩滑，所以口感一流！牛肉份量好多，唔會炒得老，仲有唔少蛋汁，真係超級超級好味！
沙嗲牛肉螺絲粉
Um…麻麻哋啦！因為新香園亦有售賣潮州粉麵，所以呢個沙嗲牛肉螺絲粉帶有一浸鹼水味。牛肉係入味嫩滑嘅，不過相信冇人想喺一碗沙嗲牛肉粉面入邊識到鹼水嘅感覺。
