【A&M Diary】M佬今日放假，特登過海陪我食lunch，仲帶我嚟到觀塘日系文青Cafe：break。break以石灰色為主色，提供日式洋食同咖啡，充滿文青嘅小清新氣息，讓人非常放鬆，啱晒返工返到好崩緊嘅我。另外，餐廳旁邊就係觀塘海濱，假日有唔少人喺海濱玩完，都會嚟到break呢度take a break！
鰻魚丼
呢個丼飯套餐配有櫻花蝦味噌湯同前菜，非常豐富。我就特別鍾意呢個墨魚嘴前菜，非常爽口彈牙，仲有成3大粒添！至於鰻魚丼嘅重點當然係鰻魚啦！鰻魚無泥味，魚肉軟綿，鰻魚汁香濃！飯面仲有醃蘿蔔、紅姜絲同紫菜，食之前記住撈勻，就夠晒好味啦！
咖哩素炸魚柳飯
想食得健康啲？餐廳亦有素食選擇，呢個素炸魚柳非常香脆，入面仲有絲絲嘅魚肉，幾可亂真！我哋另外加咗炸雞柳，雞肉炸到非常香脆又夠juicy！至於咖喱汁係日式咖喱，味道甜而不辣，非常開胃。
