【A&M Diary】近排天氣好，最啱就係做運動，一於就同A姐挑戰全港最長嘅新界單車徑啦！呢條單車徑喺2020年9月全面開放，由屯門起點，經元朗、新田、上水、粉嶺、大埔、沙田，最後連接馬鞍山，全長達60公里。不過一向少運動嘅我哋又點可以踩足全程呢？所以我哋只係踩咗成段裏面最受歡迎嘅吐露港段。由沙田踩到大埔，中間經過嘅科學園就係今次嘅中途站，嚟到WM Café & Bar 食個午餐，補充體力啦！
雞串忌廉雜菇扁意粉
雞串有成四串，好足料呀！雞肉嫩滑，醬汁濃郁。扁意粉掛上忌廉汁，好香濃，夠晒滿足。加埋雜菇嘅份量都唔少，菇香十足。
WM安格斯牛肉燒汁雜菇芝士漢堡配薯條
牛肉漢堡嘅時間掌握得好好，肉質鮮嫩，肉汁豐富，好Juicy，配上漢堡比較少見嘅燒汁，味道又出奇地夾，好惹味呀！
