【A&M Diary】灣仔嘅office林立，所以同時亦有好多餐廳選擇。至於入夜後嘅灣仔，就會由早上繁忙嘅景像轉變成沉寂嘅步調。晚上嘅灣仔令人異常輕鬆，今晚就搵咗一間幾抵食嘅西餐，同A姐撐枱腳啦！嚟到位於QRE Plaza嘅老爹，餐廳嘅情調唔錯，最重要係價錢超親民，非常抵食。
餐湯及蒜蓉多士
晚餐除咗包蒜蓉多士，仲可以揀羅宋湯或者白湯，今日嘅白湯係南瓜忌廉湯。南瓜忌廉湯非常香滑，南瓜非常鮮甜；至於羅宋湯配料十足，酸酸辣辣夠晒濃郁惹味。
蒜香雞中翼
小食就揀咗蒜香雞中翼，雞翼有四隻，即叫即炸，炸到非常香脆，外脆內嫩。雞翼入邊嘅肉仲有肉汁，尚算juicy。
焗田螺
田螺有6粒，粒粒都爽口彈牙。至於墊底有大量薯蓉，薯仔味香濃，又香又滑。
巴馬火腿銀鱈魚卷配雜菜沙律及薯角
呢個巴馬火腿銀鱈魚卷真係夠晒特別！銀鱈魚非常嫩滑，同外面包住嘅巴馬火腿形成強烈對比，口感一流！
美國頂級安格斯肉眼扒配薯菜
嘩！塊安格斯肉眼扒超大塊，真係大過一隻手掌呀！肉眼叫咗5成熟，生熟程度啱啱好，肉質嫩滑軟腍，牛味香濃，肉汁都算豐富。
