【A&M Diary】「係咁先喇，下次再見啦！」經歷完兩年大裝修嘅尖沙咀海防道熟食中心，終於同大家再見喇！熟食中心入面有10間茶檔，大部份都係主打港式風味，其中德發牛丸粉麵絕對係卧虎藏龍，德發嘅牛雜同牛丸係唔少街坊由細食到大嘅選擇，絕對係一種熟悉嘅好味道。
牛丸米
呢度嘅牛丸米有成5粒，份量十足。先講湯底，帶有清香嘅牛肉味，唔會太鹹太濃，值得一讚！至於牛丸除咗份量多，仲要超彈牙又爆汁，牛肉味香濃，真係超級好味道。
牛雜河
因為我哋唔食牛腸，所以走咗牛腸後嘅牛雜有牛膀同牛肚。牛肚有四至五件之多，口感爽彈；牛膀軟糯入味。至於河粉幼滑，配上店家自家製辣椒油，吸湯惹味！
