【A&M Diary】觀塘有唔少樓上餐廳，要突圍而出，就一定要夠gimmick！今次能夠吸引A姐M佬嘅餐廳，就係位於觀塘鴻圖道嘅Give Me 5。Give Me 5晚市推出半自助晚餐，除咗一份主菜，半自助餐區更提供即燒海鮮、海鮮冷盤、沙律、飲品同甜品，加上餐廳設有飛鏢機同桌球俾食客玩，令呢餐晚餐性價比高之餘，夠飽又夠chill！
即燒海鮮
喺Give Me 5燒烤區除咗有雞翼、牛肉串、雞肉串、牛舌串、雞軟骨、丸類同燒賣之外，最易回本嘅當然係多款燒海鮮嘅選擇啦！Give Me 5提供燒蠔、蟶子皇、海蝦、扇貝、帶子、大蜆、多春魚同秋刀魚等選擇，即叫即燒，夠晒惹味！當中我哋極力推介嘅係蟶子皇同大蜆，除咗肉身夠晒漲卜卜，更加唔會燒得太乾，加少少鹽調味，就可以品嘗海鮮嘅鮮甜味。另外，仲有即燒嘅薄切和牛，和牛油香豐富，燒過之後除咗帶有焦香感，更接近入口即融。
海鮮冷盤
除咗燒海鮮之外，Give Me 5仲有海鮮冷盤供應。選擇有凍蟹、皇冠螺、青口同凍海蝦。當中最易回本嘅選擇當然就係凍蟹啦！凍蟹超多蟹膏，蟹肉結實鮮甜；另外，凍海蝦嘅蝦身彈牙，蝦頭勁多膏，唔錯！
半自助餐區
除咗海鮮之外，自取區仲有湯、沙律同蒜茸法包，選擇夠多夠豐富。
希臘式風味烤春雞
半隻嘅烤春雞唔會烤得太乾，肉身仲非常juicy，特別係佢個髀位，咬落去係會爆汁架！加上雞身充滿勁重香草味，味道好有層次，值得推介。
加拿大斧頭豬配蘋果蓉醬
嘩！斧頭豬好大塊呀！肉身厚實，色澤粉嫩，肉味香濃而肉質軟腍。當然同斧頭豬最夾就梗係配上蘋果蓉醬啦，大大減低肉嘅油膩感。
除咗以上主菜，主菜仲有意大利西西里軟殻蟹扁意粉、加勒比海辣醬鱸魚，加拿大斧頭豬配蘋果蓉醬同澳洲肉眼扒(8 安士)配黑椒汁多個選擇。
