【A&M Diary】每次同朋友打邊爐，最怕就係有個店員行埋嚟同你講：仲有半個鐘！但我哋明明好似啱啱先開始食，真係食得唔夠過癮呀！如果你同我都有同樣嘅問題，可以考慮無限時嘅火鍋選擇。近期我哋就嚟到位於旺角嘅馬祖無限時台灣養生涮涮鍋，啱晒同樣鍾意慢慢食慢慢傾嘅你！
無限時任食台式火鍋店
馬祖無限時台灣養生涮涮鍋嘅最大賣點就係無限時任食放題，加上餐廳坐得夠舒服，真係啱晒同朋友聚舊或食得慢嘅你，食足9小時都毫無問題！
養生湯底
講起台灣嘅火鍋店，主打嘅當然係養生藥膳湯底，喺馬祖無限時台灣養生涮涮鍋嘅湯底選擇就有接近20款，其中養生藥膳選擇就有：藥膳蟲草花桃膠養生鍋、藥膳養生醉雞鍋等等！至於我哋就揀咗麻辣鴨血蜂巢豆腐鍋拼台灣沙茶雞涮涮鍋，兩個湯底都非常濃郁，完全唔使落豉油或其他調味料，食材都索晒湯汁，非常惹味。
配料
喺馬祖無限時台灣養生涮涮鍋主要以肉類分為4款套餐，今日我哋就揀咗最高級別嘅套餐，可以無限時任食極級SRF極黑和牛肩脊肉等6款肉類選擇。但就算揀價錢相對平嘅套餐，都可以食到Prime Grade美國安格斯牛肉，質素一啲都唔差！
極級SRF極黑和牛肩脊肉
請放心！馬祖無限時台灣養生涮涮鍋嘅極級SRF極黑和牛肩脊肉相當有質素，而且每一碟嘅色澤都差唔多，絕對唔會第一碟係最靚，之後上枱嘅質素就變差。呢碟極級SRF極黑和牛肩脊肉嘅油脂比例平均，接近入口即融，非常好味！
極級Prime Grade安格斯牛頸脊
呢款牛肉嘅肉味相對濃郁，脂肪比例唔重，邪惡度雖然大減，但肉質豐盈，絕對唔會食到溜。
西班牙無激素豬肉片
除咗牛肉之外，呢度嘅豬肉無激素，食得放心又健康。豬肉片色澤粉嫩，肉味濃郁，雖然脂肪比例唔多，但肉質一啲都唔嚡口，非常嫩滑。
海鮮拼盤
呢度嘅海鮮除咗魚之外，拼盤就有海蝦、沙白同蟶子。海蝦大大隻，新鮮彈牙；沙白同蟶子完全無沙，非常鮮甜。
