【Now新聞台】截至早上11點，1小時内《彭博》用戶關注度上升最多的港股，依次為中國移動、中駿集團、長城汽車、保利協鑫能源及長實集團。
中移動「回A」掀起認購潮。繼噚日個人投資者超購逾千倍，網上中籤率僅0.12%，今日公布有19間戰略投資者合計認購近一半發行股份。以每股57.58元人民幣定價計，合計認購咗243億元人仔。公司A股定價折合港元，比H股上日收市價有51%溢價。究竟H股可唔可以跟到A股個勢升一浸？
獨立股評人李偉傑坦言，唔需要抱太大期望。睇返另一電訊巨頭中國電信早前回A後，短線係有資金追入H股炒憧憬，但唔使一個月就跟返大市行。
Jason預期，中移動H股表現只會更冷清。佢話喺20%公眾持股中，北水揸住約8%，相信公司喺A股上市後，或會降低北水流入意慾，加上唔少外資遭美國禁止投資中移動，令H股乏力上升。
