【Now新聞台】截至早上11點，1小時內《彭博》用戶關注度上升最多的港股，依次為中國鋁業、騰訊控股、五礦資源、華南城、建設銀行。
兩隻內地資源股中鋁、五礦齊齊上榜，同中國稀土集團今日正式成立嘅消息有關，有分析指，中國稀土集團成立可以加強內地對金屬資源嘅議價能力，所以帶挈中鋁股價今朝最多升逾11%，係今朝表現最好成分股之一，呢單消息對中鋁股價嘅利好作用可以持續幾耐？
大華繼顯執行董事梁偉源指，成立中國稀土集團令市場對中鋁業務重組、發展有憧憬，相信中鋁子公司都會受惠，但依家好難判斷對中鋁有幾大幫助，今朝市場只係搵相關股份去炒，同埋揀中鋁、五礦，雖然呢兩隻股份比同類或相關股升得較多，但暫時其實睇唔到呢個消息，對呢啲公司業務嘅實質影響，所以今次應該係炒作居多。
