【Now新聞台】截至早上11點，一小時內《彭博》用戶關注度上升最多的港股，依次為保利協鑫、中芯國際、世茂集團、恒基地產、北京汽車。
一邊廂內房為債務煩惱，諗盡辦法撲水，但另一邊廂，保利協鑫就宣布配股集資50億，半日股價又急升超過10%，說明投資者唔介意抽水，抽得好反而成為股價催化劑。喺現時咁弱的市況，折讓2%配股抽到50億，呢個操作應該點評價？
英皇證券研究部總監陳錦興指，保利協鑫復牌後股價偏強，於高位震盪，表現唔錯令市場有啲信心，加上市場對新股配售後有憧憬，最重要係今次集資目的主要為日常營運資金並非還債，令市場對保利協鑫持有正面嘅態度，所以股價亦比較「硬淨」。
