【Now新聞台】截至早上11時，1小時内《彭博》用戶關注度上升最多的港股依次為信義光能、五礦資源、李寧、中芯國際及中國海洋石油。
信義系公布咗重大關連交易，信義光能同信義玻璃會合營多晶硅生產項目信義晶硅，信義系成立埋多晶硅嘅上游企業，成個產業鏈上中下游都有份，但反而今日股價要跌，係咪市場對信義系無信心？
大華繼顯執行董事梁偉源認為，信義今次進軍多晶硅業務會有協作效應，因為信義有自家多晶硅供應，可以幫助到信義光能生產光伏玻璃嘅成本控制，認為信義今日會跌係因為撞正同業隆基，一個月入面第二次降低多晶硅價格，而且減幅有5.7%之多，所以市場擔心今次信義系進軍多晶硅業務，可能係一個唔太好嘅先兆，導致今日市場反應比較負面。
