【A&M Diary】無辣不歡嘅我哋，今晚又去食川菜喇！食辣最緊要夠放夠盡，所以位於銅鑼灣嘅川滿居可以話係我哋嘅推介之一。川滿居嘅川菜菜式選擇多，而最滋味嘅重點係，當然係提供超過四十款配料嘅麻辣香鍋，麻香辣辛嘅味道非常惹味，令我哋越食越愛。
川滿居：香辣魚皮
作為四川菜嘅頭盤，揀咗麻而不辣嘅香辣魚皮醒醒胃先。川滿居嘅魚皮爽口彈牙，醬汁濃郁，非常開胃。
川滿居：黃金白玉菇
川滿居嘅炸漿唔會太厚，一啖咬落去由鹹香十足嘅鹹蛋黃帶領，入面包裹住炸到卜卜脆嘅白玉菇，隨時感受到菇香嘅新鮮，充滿層次。
川滿居：蒜泥白肉
川滿居嘅蒜泥白肉堆砌成一個小山丘，夠晒立體！除咗外觀之外，餐廳用上秘製醬汁，蒜辣俱備，令味道更加立體。
