【A&M Diary】又到聖誕又到聖誕，聖誕節唔通餐餐都食聖誕大餐咩？約埋成班朋友落酒吧摸吓酒杯底，都幾chill！尖沙咀一向都不乏酒吧，今日就嚟到赫德道嘅Hans Bar & Restaurant，一齊同聚暢飲今晚夜。
Woo Woo
T&T vodka, peach, cranberry, lime
一開始梗係飲啲濃烈嘅酒醒一醒神先啦！戰鬥民族嘅代表：伏特加，絕對係其中一個好選擇。Woo Woo呢款酒加入咗幾款水果嘅味道嚟分散伏特加嘅剛性，但同時都帶有一份甜美，十足十冰美人一樣。
Aestivate 蜜瓜
Widges gin, melon oleo saccharum, jasmine tea, citric acid,tonic
一入口就品嘗到蜜瓜嘅果味，但伴隨住嘅茉莉茶中和咗嗰份濃烈嘅酒精味，而顫酒一向酒性突出，所以再飲落去佢就會提醒你，呢杯就嘅主調係佢，如果Woo Woo係冷漠嘅，Aestivate就係屬於熱情嘅代表。
Tart too
Butter fat wash plantation dark rum, vanilla, frangilico, hk style egg tart foam
個酒名就話咗你知佢係同港式蛋撻有關，食就食得多，飲就真係未試過。喺你品嘗到蛋撻嘅味道之前，調酒師預先為你準備咗雲呢拿同榛果酒作為見面之用，而主角蛋撻及冧酒就留守係下層等待你嘅探訪。
Wagashi和菓子
Hojicha infused T&T vodka, Japanese red bean cordial, TE Ara Hajicha liqueur, egg white powder
呢款酒以和菓子為名，一睇個名就知係一場日本之旅。一飲落去係滿滿嘅紅豆味，而焙茶同伏特加嘅味道則慢慢伴隨住紅豆味走出嚟，甘甜得嚟又有一份刺激，就好似點解我哋咁鐘意去日本旅行咁。
燒厚切牛舌
廚師擺盤非常有心思，將牛舌粒成一小串，食起上嚟非常方便。牛舌燒得啱啱好，肉身軟腍，而且充滿牛香。作為佐酒小食，簡直一流。
松葉蟹柚子沙律
呢個柚子沙律味道酸酸甜甜，十分開胃，加上有中華沙律做底，食起上嚟更加清新，而且松葉蟹味道鮮甜，可以清一清飲咗酒嘅口腔。
意大利雲吞配白松露油雜菇醬
飲到咁上下，大家可能會有啲肚餓，呢個意大利雲吞就幫到手啦。雖然雲吞細細粒，但食多幾粒都會有啲飽肚感，令兩杯落肚嘅大家冇咁容易醉。而且白松露油非常香濃，雲吞索盡雜菇醬，非常惹味。
