【A&M Diary】香江花月係一間我哋好鍾意嘅火鍋店，除咗選料新鮮高質之外，重點係三間分店各有主題，甚至有火鍋店TeamLab之稱！嚟到銅鑼灣嘅香江花月，餐廳以港產電影為主題，除咗擺設之外，餐廳仲設計咗一間充滿話題性嘅房間，食飽飽之後，記住去影張倒流時光嘅靚相呀！
打卡主題房間
大部份餐廳都會用盡每一寸空間，擺最多嘅餐枱，但每間香江花月都有一間主題佈景嘅打卡房，而銅鑼灣香江花月分店，就以港產電影為主題，主題房間以舞台射燈同升降球燈，絕對可以擺唔同甫士瘋狂打卡。另外，門口嘅舞台售票處、復古相機、中古電單車等擺設，真係除咗食物本身之外，仲可以食埋個環境呀！
秘製花雕豬肚鍋
餐廳提供多款湯底選擇，我哋就揀咗秘製花雕豬肚鍋，打邊爐之前，當然要飲啖湯先啦！打邊爐最怕湯底一開始就好鹹，因為只會越食越鹹。好彩香江花月嘅湯底夠晒火候，帶有淡淡嘅酒香味，非常清香又有層次。鍋底入面已經有枝竹、酸菜同豬肚，枝竹索晒湯底精華，至於豬肚軟腍好入味！
香江拼
鍾意食牛嘅我哋，就揀咗香江拼，呢個拼盤有齊安格斯肥牛、手切肥牛、牛柳粒、牛白肉、牛心頂、黑柏葉和牛舌，而香江拼更以特製嘅圓形木碟，圍住鍋底，擺盤精美，食之前絕對要影相打卡！安格斯肥牛肉油花均勻，口感嫩滑牛味濃郁；牛柏葉新鮮爽口，索晒湯嘅精華就最正；牛舌嘅肉味就最濃，肉質軟腍；至於牛白肉嘅油香十足，接近入口即熔。
七色丸
七色丸包括手工芝士三寶丸、青咖喱墨魚丸、南乳墨魚丸等七款新鮮手打丸類，每款都好有心思，而且味道獨特。我就最鍾意鹹蛋黃墨魚丸同青咖喱墨魚丸，鹹蛋同青咖喱嘅味道唔會太重手而蓋過墨魚嘅鮮味，比例控制得啱啱好，粒粒都爽口彈牙，食嘅時候仲會爆汁添。
桃花緣、香芳幻
餐廳嘅飲品由專業調酒師自行設計，提供雞尾酒同無酒精嘅特飲。鍾意甜啲，中和一下打邊爐味道，就推介桃花緣，桃花緣上面有個大泡泡，真係啱晒影相打卡，而味道方面除咗蜜桃味之外，飲品中加上啫喱，增添口感，另外仲加入梳打，非常解渴。香芳幻以紅桑莓醬做底，加入乳酪，味道酸酸甜甜，夠晒creamy，非常醒胃。
