【A&M Diary】近期我哋多咗留喺屋企，唔知大家喺屋企又有咩活動呢？我哋除咗睇戲，都會打吓機，其實宅吓又有咩唔好喎？但今日要返工，我哋就去咗旺角嘅石鍋堂，食碗熱辣辣嘅烏冬為自己打打氣啦！
M佬之選：黑松露香菇湯配厚切豚肉石燒手打烏冬
呢度嘅湯底有5款，包括：魚介豚骨濃湯、山地獄辛辣湯、黑蒜油豚骨湯等，而我就揀咗黑松露香菇湯配厚切豚肉石燒手打烏冬，湯用石鍋上，所以夠晒熱辣辣，上枱時仲滾起泡泡，真係要小心辣嘴呀！湯底充滿好香嘅黑松露香味，加上用咗大量香菇，所以湯底好creamy！而豚肉厚切之餘，肥瘦分明，夠入味又軟腍。
A姐之選：和風咖哩濃湯配吉列豬扒石燒手打烏冬
A姐揀咗和風咖哩濃湯配吉列豬扒石燒手打烏冬，個咖哩超香濃，配上烏冬真係無得輸！而另上嘅吉列豬扒厚切又脆，脆卜卜好香口！
絕味燒雞翼
即叫即燒，雞翼燒得夠乾身，而且皮脆肉嫩，但略嫌肉質唔夠入味。
