【A&M Diary】玩Stayaction除咗間房要夠舒服，酒店多打卡位之外，我最期待嘅就係喺酒店餐廳食飯喇！今次M佬帶我嚟到帝樂文娜公館玩兩日一夜，酒店雖然只有一間餐廳：FINDS，但貴精不貴多，餐廳主打香港少見嘅北歐菜，夠晒新鮮感！
帝樂文娜公館Staycation詳情：超現實北歐主題打卡 尖沙咀帝樂文娜公館
餐廳FINDS嘅命名係以北歐五個國家，包括Finland（Finland）、Iceland（冰島）、Norway（挪威）、Denmark（丹麥）、Sweden（瑞典）嘅第一個英文字母組成。雖然我哋今次嘅Staycation Package已經包咗午餐同晚餐，但就算係非住客，因為FINDS嘅情調非常好，除咗可以試吓北歐菜，亦非常適合嚟呢度慶祝紀念日㗎！
午餐詳情：高質北歐主題午餐 帝樂文娜公館FINDS
北歐蟹肉餅
蟹肉餅有兩粒，酥脆嘅外皮，入面勁多蟹肉，非常鮮甜。可以加埋伴菜嘅醃青瓜、醃魚子及雷莫拉蛋黃醬一齊食，口感大大提升。
海鮮冷盤
首先呢個海鮮冷盤嘅盤真係好冷，以確保放喺上面嘅海鮮保持新鮮。海鮮有帶子、自家煙燻蝦肉、藍青口、甜蜆、甜菜根漬三文魚、醃三文魚，每一款海鮮都非常新鮮。其中甜菜根漬三文魚就先用甜菜根醃製，令三文魚醃成酒紅色，加上魚肉泛出嘅油光，賣相吸引。我哋另外配上白酒，同呢個海鮮冷盤就更加perfect match。
香烤榛子白甘筍芹菜頭湯
湯嘅味道帶有白甘筍同芹菜頭味道，好有層次！伴碟嘅脆炸羽衣甘藍非常香口，我就鍾意將佢連埋啲湯一齊享用喇。
香烤龍蝦三文魚湯
同上面個湯相比，呢個龍蝦三文魚湯就非常濃郁，特別係龍蝦味非常出，相信大廚用咗好多龍蝦熬製而成。
鱈魚柳伴肉桂葉
鱈魚柳皮脆而肉質嫩滑細緻，油質豐富又無骨，啖啖肉好滿足！伴碟嘅都唔馬虎，有檸檬碎薯仔、烤西蘭花球、烤南瓜同香蔥蛋黃醬。
