【A&M Diary】近期實在太多抵玩嘅Staycation選擇，睇到人花多眼亂，所以唔少酒店都推出唔同嘅主題，等識玩嘅你玩得更有深度。其中，位於尖東嘅海景嘉福洲際酒店 Intercontinental Grand Stanford Hong Kong 近期就推出咗「情迷威士忌」住宿計劃Malt & Stay Package，令到鍾意飲Whisky嘅M佬大為心動！如果你都對威士忌有興趣，或者好似我A姐呢啲剛入門接觸威士忌嘅初學者，呢個package都好適合你，因為酒店安排咗資深威士忌大使，帶領我哋深入淺出鑑賞同品味威士忌。
洲際行政俱樂部
酒店位於尖東麽地道，由尖東/紅磡港鐵站步行5-8分鐘即可到達，交通非常便利。而我哋今次特登upgrade咗，順便試埋洲際行政俱樂部嘅服務。經過體溫檢測之後，就直接去到位於1樓嘅洲際行政俱樂部check-in，服務員見到我哋，已經提前開門迎接。Check-in過程中，服務員會先了解你嘅入住喜好，仲細心幫我哋安排至下午3點退房。
呢度嘅服務時間由早上6點半至晚上11點，除咗享有尊屬櫃位辨理入住及退房服務之外，當然唔少得嘅就係餐飲服務啦！另外，仲可以免費使用會議室同打印服務，啱晒商務旅客嘅需要。
我哋check-in完之後，首先喺洲際行政俱樂部嘆番個下午茶，下午茶時段供應唔同小食同飲品，其中佢個芝士蛋糕真係好好好好味呀！
另外，我哋都喺洲際行政俱樂部享用Happy Hour，除咗有紅酒、白酒、香檳，仲有唔少烈酒選擇。同M佬望住個海景飲吓酒都夠晒寫意。至於呢般時間嘅食物選擇都唔少，更有熱食提供！
60分鐘威士忌大師班
而今個package嘅重點，當然就係60分鐘威士忌大師班啦！原來酒店嘅Tiffany's New York Bar有超過300款威士忌，由大牌子威士忌到獨立酒廠限量版都有。對於威士忌初哥嘅我，由威士忌大使帶領我哋深入淺出鑑賞同品味威士忌。過程中，大使會安排我哋品嚐三款威士忌，由左至右淺嘗淡至濃嘅威士忌。導師仲會分享每杯威士忌嘅原味道、製作過程，甚至係每個酒廠嘅生產特色。其中大使更提到，味道呢樣野好個人，始終大家飲食文化同背景唔一樣，可能你飲到係西瓜味又或者佢飲到嘅係桃味，但實情原來係無西瓜同桃嘅元素，或者呢個就係威士忌嘅魔力。另外，除咗內在嘅味道，原來威士忌嘅外在都有好多特別設計嘅玻璃樽同招紙㗎！
洲全清潔承諾
疫症期間，酒店加強清潔，公眾地方都放置咗唔少酒精搓手液，去餐廳或行政俱樂部都會有信封或膠套畀你放口罩，非常細心。入客房之前，門口貼住清潔承諾貼紙，表示房間清潔，推門貼紙就會撕開。另外，房間裏面仲有「安心包」，有口罩、消毒濕紙巾同搓手液，真係令你住得安心！
客房區域
至於房間方面，我哋入住嘅係尊尚海景客房，一打開房門就已經俾個海景深深吸引住！正對面就係東區走廊、天后同炮台山一帶，而海景無遮無擋，甚至睇到灣仔會展，以及東面嘅太古城，視野景觀好遼闊，啱晒大家影相打卡！當然，你亦可以拍張床去窗口，影而家最受歡迎嘅港女海景床照啦！
房間好大，活動空間好多，所以床都夠晒大張以襯番呢個大面積嘅房間。呢張床褥軟硬適中，超舒服。另外，呢度亦提供枕頭menu，可以根據你嘅喜好同習慣，選擇一個最適合自己嘅枕頭，真心一瞓上去就瞓著覺喇！
窗簾需要手動調教，但遮光度十足。至於燈光控制喺床邊，配有插頭位，夠晒方便。
房間當然唔少得衣櫃、保險箱、拖鞋同浴袍啦，至於衣櫃內亦放有雨傘、熨斗同熨衫板等用品，夠晒貼心！另外，房間內設有mini bar，除咗免費嘅茶包，仲有capsule咖啡，同收費嘅零食、汽水同酒等。
另外，書檯夠晒大張，啱晒大家進行小型會議或做嘢，我同M佬就喺呢度進行咗一場家庭會議2.0！
浴室區域
浴室唔算好大，但五臟俱全。沐浴用品使用AGRARIA品牌，而其他個人用品都齊全。但我好唔鍾意呢度個浴室磅囉，磅重人嘅（M佬話我肥咗係事實，唔好賴個磅喎）。
泳池及健身室
酒店於頂樓設有露天恆溫游泳池同24小時開放嘅健身中心，不過，近期因疫情下而未有開放。相信望住呢個城市靚景做運動，一定事半功倍。
