【Viu】許志安噚晚喺紅館舉行第二場個唱，請嚟李克勤擔任嘉賓合唱《從你祝福中離開》同《深深深》兩金曲，安仔唱完即感謝克勤特登改機票趕返港支持，克勤話都要睇雙方友情係咪重要嘅，明晒啦！
然後二人大講當年「最受歡迎男歌星」嘅逸事，安仔係2001年攞呢個獎，克勤就係2002年攞，佢重提當年四大天王紅到爆，造成壟斷樂壇頒獎禮情況：「我嗰時真係唔知除咗四個天神之外，仲可以有其他人攞。係你攞完之後，大家先知原來自己都有機會。」克勤又話希望安仔唔好隔太耐先開騷，承諾下次安仔再開願意再做嘉賓。
其後安仔唱《其實你心裡有沒有我》及《二人行一日後》等金曲，將紅館變成大K房，全場大合唱，連是夜嚟捧場嘅梁詠琪、陳柏宇都齊齊唱，氣氛好歡樂！到感謝各合作夥伴環節，安仔多謝到一半，觀眾大叫Sammi，但佢好專心繼續多謝完要多謝嘅單位後，就轉身走上小舞台，準備唱歌，喺燈光轉換之際，安仔忽然講咗句：「多謝Sammi。」隨即惹嚟全場歡呼，跟住佢就唱出《我的天我的歌》啦。快啲睇現場片啦！
