【Viu】BIG FOUR紅館騷今晚舉行尾場，造就「兩神合體」，事關子華神同Eason都有捧場！席間BIG FOUR邊唱《火熱動感lalala》邊跟觀眾握手，High爆全場！
Encore時，許志安同張衞健大晒舞功跳《孤獨探戈》，蘇永康同梁漢文負責獻唱。其後四子各自獻唱經典歌曲《越吻越傷心》、《七友》、《爛泥》同《身體健康》，勾起全場觀眾嘅集體回憶！
到鳴謝環節，當Dicky話要多謝髮型師時，全場哄堂大笑！完成例行公事後，四子隨即盡訴心中情，蘇康自爆促成今次開騷全靠一餐飯，感激三位老友陪自己走過呢段旅程！最爆笑嘅莫過於Dicky公開向Eason放話，佢話今次決定「用表演說話」全因上次開騷後畀Eason挑機冇「專心唱歌」，所以決定喺個人表演中刪除所有Talking環節，全程合埋眼投入獻唱《身體健康》，仲問Eason覺得自己唱成點，Eason亦直豎姆指讚好！最好Dicky發起同12號正日生日嘅安仔慶生，隨即全場大合唱生日歌，壽星仔感動話咁大個仔都未試過有咁多人同自己慶生。
BIG FOUR最後以演唱會主題曲《赤子們》作結，Edmond臨落台時仲高呼：「希望下次BIG FOUR演唱會唔使等12年啦！」
此外，張繼聰同太太謝安琪、張玉珊同男友盧啟賢、周勵淇、狄波拉、呂良偉同太太楊小娟、Yumiko同囡囡梁浸浸等都有捧場！
