【Viu】古天樂完成一連兩場澳門個唱，周日（30日）晚尾場除咗有宣萱、農夫、CY陳宗澤輪住登場， 仲有MIRROR成員姜濤、 汪明荃、劉俊謙加入做表演嘉賓，氣氛繼續High爆！
古生、姜濤先合唱張國榮經典金曲《當年情》，姜濤以前見古生都係表情嚴肅，唔知係咪因為今次見到佢多啲表情，所以大膽到竟然向古仔提出特別要求，話希望可以畀佢抱一次，仲模仿前一晚偶像「小豬」羅志祥咁撒嬌扭計！姜濤最後成功「公主抱」古生，仲轉咗一個圈加嘟嘴扮錫錫！ 古生嚇一嚇都笑住大讚好嘢！
姜濤完騷後就喺IG Story話自己騷前真係有用AI問問題，想知同古生傾咩話題，佢本身唔小心打錯自己名，佢更正自己係姜濤之後，AI就回應：「原來你是姜濤！真是失敬，難怪今晚會做他的嘉賓。」姜濤表演完喺後台同阿姐汪明荃開心集郵！
阿姐繼喺香港做古生嘉賓之後，是夜又「過大海」做壓軸嘉賓唱《迷人Pink Lady》及《熱咖啡》，剛迎來79歲生日嘅阿姐開心話：「我係最重要嘅嘉賓！」古生即爆料指阿姐騷前嘅下午專登上台睇姜濤綵排，仲即場大讚姜濤，又讚：「現場唱得幾好」、「有前途」！阿姐亦有同宣萱聚舊影相！
到宣萱上台後，有粉絲就大叫「結婚」，古生回應話係兩兄弟。古生又講係自己入行33年，喺唱《紀念日》之前，佢要請音樂總監徐浩上台一齊合唱！
澳門站尾場仲有另一驚喜，就係「信一」劉俊謙現身舞台，孖住「城寨兄弟」林峯、胡子彤同古生載歌載舞！ 阿謙自言本身並非一位歌手，近排一直努力去聽晒古生嘅歌，古生即出題叫佢唱《杯麵》，阿謙先搭錯線唱出《男朋友》，古仔隨即大喝：「《杯麵》呀！」 阿謙聽完擰轉面畀「背面」三位，古生扮嬲話：「城寨你唔使睇！我睇返！」阿謙即刻下跪認錯，笑C！係唔係見字都覺得精彩？Click入嚟睇片喇！
