【Viu】邱禮濤導演今日再率領《我們不是什麼》團隊到戲院做終極謝票，AK江𤒹生、ANSONBEAN、譚耀文、袁富華、李蕙敏、朱栢謙、駱振偉、盧巧音等都有到場，謝票時仲忽然拎出蛋糕，為噚日生日嘅邱導慶生，孖埋全場觀眾唱生日歌，好歡欣！
AK下星期就開始忙「FING小組」演唱會嘅綵排，小組新歌亦快將推出，AK覺得首歌好代表到佢哋四個嘅關係同感情，有好bro嘅感覺！佢亦要開始準備新劇《悠長假期》前期工作，已陸續收到劇本同埋要試造型，仲有要拍團綜，真係忙爆！
至於啱啱收養狗女Mine Mine，AK話本身只諗住暫託，但見佢同猜柴相處好OK，喺大佬猜柴同意下決定將佢收歸旗下，妹妹Mine Mine都嚟咗屋企近三個禮拜，AK話自己都嘗試習慣緊呢件事，不過佢係經過考量之後又覺得相處到，所以先決定接納呢個新生命嘅！
ANSONBEAN就啱啱拍完一部電影，之後會忙舞台劇，如無意外月中出新歌，正式回歸樂壇！講到佢細佬Ian Hannz都拍緊邱導新戲，ANSONBEAN話自己未去到可以俾錦囊，都係叫細佬加油努力之類，仲讚細佬好勤力做準備添！
呢齣電影喺4月上映到而家足足四個月都仲有得謝票，邱導就話呢部戲謝票多過佢以往啲戲加埋，見到咁多觀眾支持好感動，覺得套戲好值得拍，回唔回到本已冇所謂！Amanda都話第一次做咁多謝票，覺得觀眾問啲問題好高質！講到曾有傳佢婚變，Amanda話完全冇嘢係笑料，老公聽到呢單新聞都係得啖笑！
