【Viu】尹光、方力申呢對跨代老友趁父親節前夕宣布推出《老豆》合唱版，同時更搞咗場「爆旋陀螺大激鬥」，結果竟然唔係曾唱過《爆旋陀螺2》主題曲嘅小方贏，而係榮升陀螺專家嘅光B以6:0大比數勝出！唔知佢哋下次又搵咩battle？
講到即將首次過父親節，小方酸爆話愛囡Isla已經叫咗聲「Mama」，但就仲未叫「Baba」，希望呢幾日直入「Baba」呢個詞畀阿女，靜候等Isla開金口！平時見小方都會post幫囡囡沖涼嘅片，但呢期佢就話因為一個原因少post，係因為咩呢？而光B就話仔仔移民咗去澳洲幾年，每日都會同埋孫女FaceTime，係愛呀！
小方早前趁幫愛囡搞百日宴嗰陣，同日夜晚就補辦返個婚禮畀老婆Maple！依家有女萬事足、連比賽都可以放棄唔去嘅小方，有意乘勢出擊再追多個？被光B踢爆之前話鍾意仔嘅小方，改口話鍾意女更多？
「King Sir」鍾景輝日前於睡夢中離世，小方曾與King Sir合拍電視劇《甜酸爺爺》，指會永遠懷念「爺爺」，又透露雖然少見面，但私下都會有電話問候。因同劇成好友嘅劉愷威被傳拖新歡去睇小方演唱會，小方知唔知好友有冇拍拖？
另外，黃百鳴因內幕交易罪成判囚5個月，今日撒銷擔保即時入獄，尹光指之前都有同黃百鳴唱歌，但已經有幾個月冇見冇聯絡，都係睇新聞先知對方被證監會票控，相信黃百鳴好快返出嚟。
