【Viu】台灣搖滾天后Shino林曉培喺伊館嘅《林曉培心動座標演唱會 — 香港站》，喺唱首本名曲《心動》後完美結束，佢事後開心受訪大讚觀眾相當熱情，全場大聲一齊唱歌嘅聲音係唔可以低估嘅，對佢未來好具有指標性，令佢好感動同埋更加愛香港呢個地方！
至於講到Sammi任嘉賓，佢話綵排時已見過面，當時Sammi因為鼻竇炎把聲已經唔係好掂，作為粉絲都想叫佢返屋企，但Sammi話因為答應咗點都要嚟，Shino真係好敬佩同感激Sammi！講返綵排時傾過啲咩？Shino話緊張到唔記得，當時都唔敢提返做新人時嚟香港曾經相遇嘅小故事，仲笑言自己係隱形人，坐埋一邊就可以。
Shino喺台上話7月會去啟德睇Sammi演唱會係堅的，但問到佢會唔會想做返嘉賓？佢就堅拒話唔會，因為相信Sammi有自己嘅安排，佢只會以觀賞同學習嘅心態去睇，作為Mi粉去影張相合個照就夠！佢又透露Sammi有私底下講咗啲鼓勵說話，但唔會公開同大家講，不過相信自己返到台灣，成個星期發夢都識笑。快啲睇足本訪問同聽《心動》啦！
