【Viu】《尋秦記》上畫已經超過兩個半月，但氣勢依然強勁，截至噚日港澳累計票房已經衝到$96,891,344！眼見觀眾咁支持，電影公司即刻趁呢個週末搞咗兩日「龍芳CP限定謝票場」，古天樂同宣萱呢對黃金拍檔噚日再度出動，走訪戲院同粉絲見面，結果場場三分鐘內掃清。
謝票其間，古仔同宣萱答問題時又風趣又鬼馬，搞到歡笑聲不斷，直頭變咗粉絲聚會咁滯。宣萱仲化身御用攝影師，幫古仔嘅粉絲同偶像拍片，認真識做！嚟捧場嘅除咗忠心耿耿嘅老粉，仲有唔少一家大細，當中有位三歲小孩相當搶眼，佢以一身「迷你秦王」造型現身，可愛到爆，成功吸引咗出名鍾意小朋友嘅古仔注意，二話不說揀咗佢上台攞禮物，仲親自行過去成個抱起「小秦王」上台答問題，場面溫馨到暈，搞到成場fans勁葡萄！事後受訪講到有家長專登幫小朋友扮小秦王，古仔都忍唔住讚吓：「雖然小朋友得三歲，未必知我同宣萱係邊個，或者秦王係咩人，但家長願意花咁多心思去支持，真係令我覺得特別開心。」
對於電影上畫咁耐依然咁受歡迎，宣萱同古仔都話好感動，更指有好多粉絲由上年12月尾上映到依家，睇咗十幾次都有！咁受歡迎，會唔會考慮拍返個「龍芳CP」外傳，等大家可以網上繼續延續呢段情？古仔就賣關子話：「呢個世界咩事都有可能發生，或者可以考慮吓！」睇嚟粉絲們可以繼續期待吓喎！
