【Viu】胡定欣今日以特別嘉賓身份出席《新城廣播丙午馬年新春團拜》暨節目巡禮，同舊拍檔馬浚偉、薛家燕喜相逢，身為新城高層嘅馬仔除咗向定欣大派開工利是，當然要收返新婚人妻嘅利是啦，呢位「真馬仔」仲搞笑問定欣生唔生「馬仔」？定欣即秒回：「我食馬仔！」
事後受訪時定欣透露今年同老公封雙封利是好緊張，因為數量雙倍，預算5位數，仲話派畀未婚前輩時都會向對方催婚，好似當年自己畀後輩催婚一樣，認真搞笑！佢又話已經同「胡說八道」姊妹團拜，自己亦有派利是畀未嫁嘅姚子羚，但就大晒視后級演技指唔知子羚緋聞男友徐偉棟有冇去喎！定欣又預告今年會出新歌，笑指同馬仔相熟可能派台有著數，仲話想返香港開騷添！
至於家燕姐都話好耐冇見定欣，但唔會催佢生B，順其自然，又大讚定欣聲底好，以前一齊登台已經覺得佢唱歌好聽，覺得佢有潛質做歌手。家燕姐又分享4歲幾孫仔嘅拜年趣事，同埋「七公主」60周年點慶祝，想知就睇足本訪問啦！
