【Viu】新城廣播台今日舉行團拜，獲影帝張家輝現身力撐！薛家燕即刻把握機會同家輝chit chat，指雖然雙方未曾合作，但每次見面都會講聲加油，點知張家輝搞爛gag笑話想收油，引全場發笑！家燕姐又叫張家輝對後輩講啲鼓勵說話，家輝又會爆咩金句出嚟？
事後家燕姐繼續大讚張家輝係所有後輩嘅借鏡，又乖又努力，知道對方最近為新戲唱主題曲，話遲啲有機會想同張家輝嚟個合作、crossover其他歌，甚至教對方跳十字舞後再battle！
家燕姐指啱啱成家人同埋孫仔一齊去日本玩，其中一個行程係睇富士山，大讚3歲半嘅孫仔有才華，識得講日文，咁堅係好surprise喎！家燕姐讚揚新抱好勁，教識孫仔多國語言！
另外，粵語片笑匠「俞明叔」俞明喺日前年初七離世，享年100歲。家燕姐話聽到噩耗都好唔舒服，指俞明叔係睇住佢大，都曾經合作過20多次，同對方拍喜劇係寧舍開心，係一個和藹可親、受人敬重嘅前輩，現希望俞明叔家人節哀順變！
