【Viu】忙住開巡迴演唱會嘅陳曉東特別為咗「新城 33 周年台慶 Show」返嚟香港，並獻唱經典歌《一萬年》，同埋新歌《大細路》，佢笑指好耐冇喺香港，今次參與電台騷仲緊過自己開演唱會添！
東東隨後與另一位90年代「情歌王子」孫耀威組成「限定男團」合唱《那誰》。原來呢次係兩位出道30年嚟第一次同框，東東建議兩人團名改為「F2」，老孫就表示佢兩位都著黑色衫，應該改做「Black Black」，又搞笑話其實有「Pink」，Deep V上陣嘅佢望住自己心口話：「唔係好出得街」，認真抵死！老孫之後帶嚟出道歌《愛的故事(上集)》，掀起全場集體回憶！
而「鎮台之寶」薛家燕，聯同家燕媽媽藝術中心的學生跳唱一曲《Sexy Music》，跳完仲係勁有中氣，家燕姐話保持開心人都靚啲，又教大家每日要「三笑」！
