【Viu】Edan呂爵安今個月21號迎來29歲生日，佢fan club繼早前喺銅鑼灣搞咗個靚靚生日展後，噚日再喺亞博舉行《Lifted by Love, Rising Together～By Edan’s Side 2026》生日會，同一眾「爵屎」熱鬧慶生！一向都俾粉絲追住影嘅Edan，今次竟調轉頭化身「站哥」，拎住相機四圍捕捉台下粉絲嘅可愛瞬間，搞到大家爭住搶鏡，場面超歡樂。佢仲即場抽粉絲上台傾偈互動，笑料不斷！兩位大學好友兼後援會創辦人亦有現身撐場，畫面相當溫馨。
全晚最高潮莫過於無人機升空應援一刻。當全場大合唱《My Apple Pie》時，空中亮起「e to E」圖案，象徵「爵屎」一路陪住呢位「迷人星星」發光發亮。之後大會播放一段Edan寵粉回顧影片，全場再唱生日歌切蛋糕，Edan笑言希望可以同大家「開生日會開到80歲」！
壽星仔又感性分享心聲：「聽到你哋講咁多嘢，話我帶俾你哋力量，又陪住你哋一段時間，其實我自己都會覺得，我真係冇做過啲咩特別嘢，只係做緊自己份內事，同埋做自己鍾意做嘅嘢啫。但竟然會有咁多人咁支持我、咁錫我，仲為我做咁多嘢，真係唔知點樣形容個感受。就好似我喺街市隨手執咗隻蛋，炒咗個蛋，你哋就話佢係米芝蓮三星咁去欣賞，呢份珍惜同愛錫，真係好感動，真心多謝大家。」
至於生日願望，Edan就希望大家可以一齊變得更好：「希望我哋可以帶多啲愛俾身邊嘅人，一齊進步，唔好咁容易俾外界影響，踏實做好自己，變得更加成熟、更加開心、更加幸福，一齊開心幸福。」
最後Edan喺滿場星星燈海中同粉絲大合照，仲逐一揮手歡送每位「爵屎」，為生日會畫上圓滿句號。生日會完結後，Edan仲專登去返生日展打卡，親手留低窩心留言俾粉絲，巧有愛啊！
