【Viu】《杜德偉GET UP 世界巡迴演唱會 - 香港站》尾場今晚舉行，期間Alex杜德偉眼濕濕憶述同亡父杜奧利嘅相處點滴，螢幕上亦出現Alex爸爸、媽媽張露同一家人嘅舊照，仲用AI技術將爸爸抱住Baby Alex嘅照片整成動畫，再演化成Alex同囝囝AJ嘅照片，大派洋蔥！
年僅9歲嘅AJ隨即上台合唱《Wonderful World》，三代隔空合唱，感動全場觀眾！AJ一班同學仔仲專誠去台前獻花，Alex接過花束時差啲Kick親，仲呷醋話自己都冇花收，又問阿仔做咗功課未，點知AJ秒回：「做晒啦！」笑爆全場！
Alex其後換衫跳唱三首經典歌《拯救地球》、《讓自己快樂》同《愛你的全部》，63歲依然勁度十足，Respect呀！
尾場捧場嘉賓繼續星光熠熠，包括黃子華神、吳建豪同媽咪、林敏驄、呂方一家三口、李玟二家姐李思林同媽咪、Fatboy、草蜢、Gin Lee、方力申等。Alex哥哥杜德智同舊愛李樂詩都有捧場，但分兩邊坐，期間林敏驄仲因為座位安排而整蠱子華神，認真搞笑！
