【Viu】竇靖童（Leah Dou）《狀況外》世界巡迴演唱會，噚晚喺香港舉行終站，童童落足本錢同心思，特別喺上海運嚟自己買嘅音響控台，希望將最靚、最完美嘅音質帶俾香港樂迷！此外，童童更為香港樂迷準備一份「見面禮」，首次現場演唱媽咪王菲嘅《暗湧》，前奏一響起全場即時起哄，童童坦言好鍾意《暗湧》呢首歌，「加上因為係第一次喺香港做show，所以想唱一隻我覺得大家可能會鍾意嘅歌，想有好多surprise for香港嘅觀眾。」
歷時兩年嘅世巡，唱咗十多個城市，童童共有30套歌衫，嚟到最終站香港，佢特別換上一套全新嘅白色歌衫，向來少著白色衫嘅佢，簡約得嚟又有自己風格！從來冇encore環節嘅童童，喺香港竟然打破慣例，完場後全場觀眾唔肯離開，不斷大叫「encore」，最後童童再度現身，唱出從未曝光嘅全新單曲《Fruit Fly》，作為送俾香港歌迷嘅終極大禮！
童童嫲嫲是夜專程嚟支持孫女，適逢噚日係康堤21歲生日，佢帶同男友Shou Honda與父母Eason陳奕迅同徐濠縈一家四口嚟睇騷當慶祝，捧場嘉賓仲有容祖兒、陳蕾、雲浩影同男友T-Ma、張蔓芝同張蔓莎及江旻憓等！
