【Viu】為電視劇《男親女愛》主題曲《藍天》作曲嘅音樂創作人Wing羅金榮，為慶祝出道40年，今日開記招宣布舉行「羅金榮·第1次自己話是演唱會2025」，Wing獲多位圈中好友拍片祝賀，當中包括蘇永康、蔡一智、蘇志威、關心妍、專家Dickson等，片尾仲有老best黃子華添！點知子華神講講吓，直接現身上埋台，超Surprise！子華神唔單止人到祝賀，仲準備埋大禮金腰帶，令Wing不知幾咁感動！子華神喺台上分享二人嘅相識經過，更大爆埋懷疑當年西洋菜街嘅掟鏹水事件係關老友事！
事後Wing受訪還原當日意外發生嘅經過，再自爆嗰陣有個叔叔「收佗地」！未知到時開騷，Wing會唔會拖埋個喇叭仔出嚟，重溫當年busking嘅時光？又會唔會邀請子華神上台合唱《藍天》？Wing透露同子華神有個「私竇」jam歌，佢打鼓、子華神彈結他，唔知有冇錄低啲咁珍貴嘅moment？
另外，另一位老友蘇康原定10月頭喺浙江溫州舉行演唱會，惟因其曾有涉毒歷史，遭網民向相關部門以「涉毒藝人」檢舉，官方亦啱啱宣布確認演出取消！Wing聞言表示好可惜，撐老友喺最近嘅BIG FOUR紅館騷狀態大勇！想知更多就即刻去片睇足本訪問啦！
