【Viu】黃子華、衛詩雅、朱栢康、Rosa韋羅莎同陳茂賢導演今日為《破．地獄》謝票，子華神甫現身戲院，大批影迷即高呼：「回水、除褲、金盤反口！」大會又公佈票房截止今日已高達8800萬，認真厲害！
子華神首先澄清今日唔係嚟謝票，其實係嚟就兩件事道歉，第一係低估咗觀眾嘅接受能力；第二係低估咗香港電影嘅能力，佢坦承自己原先預計嘅票房只係今日嘅一半，仲話：「原來香港電影係冇天花板㗎！」子華神仲希望大家繼續入場，只要破紀錄就可以解鎖「導演加長版」㗎喇！
講到「下屬」鍾雪瑩封金馬影后，子華笑言證明《破．地獄》福有悠歸，自己就唔多諗獎項喇！咦？咁羨唔羨慕楊老闆加陳導人工兼送樓呢？子華神就話想分個廚房，仲將同Do姐「世紀合作」嘅重任交喺陳導手上喇，勁期待呀！
此外，衛詩雅今日「39+1」生日，仲話父母、家姐姐夫今朝驚喜現身謝票場賀壽，令自己感動爆喊！朱康就親解「演員做自己論」，仲再三強調好想、好需要拎獎；Rosa就直言自己嘅篇幅好夠，再長啲驚喊乾眼淚呀！
