【Viu】由黃子華、許冠文、Michelle衛詩雅、朱栢康、周家怡等主演嘅《破·地獄》，上畫6日票房已經速破3500萬大關，仲打破香港電影開畫日多項紀錄，氣勢如虹！
喺今日釋出嘅幕後花絮中，子華神喺戲中親自為猝逝嘅「蓮姐」金燕玲化妝，為求演出逼真，子華神喺埋位前跟專業化妝師瞭解每一個步驟，相當認真！子華神笑言可以轉行：「我係好慶幸，參與咗一部好真實，好多research嘅戲，如果我有一日冇得撈，我覺得我都比一般人優勝，可以去應徵禮儀師呢個崗位。」
而金燕玲喺扮演遺體時亦表現敬業，親自瞓入棺木，仲連唞氣都唔敢。佢分享時仲感觸落淚：「我係一個好感性嘅人，可以參與到今次工作，我哋付出少少，同到後生一輩合作幫到佢哋，我都覺得係一件好值得嘅事。」佢仲大讚Michelle嘅表現：「佢係一個好努力、希望有成長嘅演員，我會特別珍惜呢種演員。」
同場加映衛詩雅特訓9個月學破地獄，仲有海報劇照展亦喺聽日強勢回歸，仲唔快啲入嚟睇片！
