【Viu】33歲阿Will柯煒林7月底公布確診肺腺癌第四期， 因而未能參與首次主演舞台劇《笨蕉大劇院》，由余家溢頂替演出。而阿Willl一直未有鬆懈，喺治療嘅同時都參與劇組排練！
直至噚晚「笨蕉」第25場，阿Will終於首次踏上舞台演出，官方亦公布佢同余家溢會喺餘下場次分擔演出，一切視乎Will狀況同健康為前題！
狀態大勇嘅阿Will現身謝幕時，台下觀眾送上熱烈掌聲同歡呼聲！阿Will分享感受：「由8月8號到依家係經歷咗一段長時間，但我依家剩係想同大家講舞台嘅魔力係好大。有時候我會覺得唔太好彩患咗呢個病，但亦都好彩喺呢個時候我知自己有呢個病，因為係咁啱呢個時間《笨蕉大劇院 》嘅所有人都陪我度過。 」
阿Will繼續講：「我唔想大家剩係記得我係患咗呢個病嘅人，由大家認識我到而家，我都係一個演員，我好少可會專登講私人事情，好少提演戲以外東西，因為我一直知道演員本份。如果唔係有呢個舞台劇，其實我未必會公布患病呢件事，但亦因為公布後得到咁多嘅愛。得到咁多愛後，我亦開始慢慢恢復，我下一步就要希望帶畀大家更好作品，唔好講病唔病，我係第一次踩台，你哋魔力真係好大，呢個病除令我學咗一啲嘢，我好似喺演員呢一個本份上又學多咗一課，我希望我可以繼續繼續演戲演落去，因為呢個先係我嘅生活，我永遠保持生活如常、如常生活。」
阿Will再多謝《笨蕉》團隊：「呢段時間除咗屋企人，陪我行呢條路係佢哋 (《笨蕉》團隊)，其實同佢哋唔係好熟。」阿Will開始哽咽 ：「就係因為佢哋陪伴，我呢一段路行得輕鬆咗。所以，我會繼續演好每一個畀我嘅角色，做好我演員嘅本份，呢一個我每日都學緊嘅嘢，今日我又再學多咗一課，多謝你哋！ 」阿Will分享完之後就同台前幕後擁抱，亦同余家溢攬到實一實表達謝意，場面感人！
最後，林海峰話：「今場係阿Will嘅第一場，嚟緊嘅場次，我哋都會同阿Will咁，由頭嚟過，希望愈做愈好，希望身體愈嚟愈好！希望有一日，唔好話放風箏、放熱氣球，放火箭、放穿梭機都得！ 」
