【Viu】由Dicky張衞健、許志安、阿公蘇永康同埋Edmond梁漢文組成嘅BIG FOUR，相隔12年合體再踏紅館舞台，台前幕後陣容強勁，演唱會海報更重金禮聘鬼才Jan林海峰擔任創意大腦，星級攝影師夏永康親自操刀添！Dicky爆料「BIG FOUR」由Jan命名，「我哋第一張演唱會海報，4個人咬住一支玫瑰花嗰張，就係由Jan幫我哋做。好開心今次我哋三顧草廬，邀請到佢出山。」Jan幽默回應：「嗰次演唱會喺2010年，即係隔咗15年先至有第二個job，都算係咁，我都終於發市！」
今次演唱會「HAPPY TO SEE YOU ALL 」再由Jan命名，佢搞笑話原來想用「BIG FOUR無穿無爛演唱會」，但又覺得中文名唔適合，「不如諗個英文名，就叫『BIG FOUR BODY CHECK演唱會』，每次上台都係你哋同觀眾嘅一次體檢！」Dicky補充：「唔騷唔知身體好！」Edmond則稱：「BIG FOUR係我哋嘅『根』，咁耐無見，梗係要一齊搞啲正嘢畀大家啦！」
而BIG FOUR嘅「時裝擔當」阿公，被Jan問到今次四子造型，身形發福嘅佢話困難喺自己度，「好開心又再同大家襯衫襯飾物，但我而家嘅size俾唔到佢哋用，除咗啲披肩圍巾之外。Jan笑指安仔低胸上陣，安仔即掩住心口，拉開話題：「雖然我哋也成日見面，但一齊喺舞台上出現，真係好耐無感受到，直到今日一齊影海報，感覺到個力量返嚟啦！」
喺海報拍攝期間，現場播放多首有關友情嘅歌曲，Jan指最初揀咗《監獄風雲》首歌《友誼之光》為BIG FOUR帶入情緒，「佢哋四個好快就好自然咁入咗嗰個氛圍，呢個就係大家都好想喺台上見到佢哋俾大家嘅感覺。尤其是Dicky，佢好清楚我想大家表達乜嘢，一直帶住大家，始終都係最大。」Dicky一臉認真，扮作有感而發，「長輩嘛，『牽牛上樹』係有啲難度，仲要係三隻牛，但係佢哋都算乖、聽話！」Jan以醇酒形容四位嘅友誼同情懷。
