【Viu】一連50場舞台劇《笨蕉大劇院》噚晚正式公演，阿Will柯煒林因確診肺腺癌第四期，被迫退演， 角色暫時由余家溢頂上。
演出完畢，林海峰喺謝幕時特別向一眾台前幕後致謝， 之後佢感慨表示：「其實呢個舞台劇都籌備咗接近一年，成個團隊都諗緊個劇本好唔好、收到劇本後啲對白寫得好唔好、我哋跟住導演或者Acting Coach嘅指導又做得好唔好，同其他演員點配合會更加好，又或者我自己對劇本嘅理解， 甚至我自己待人接物方面做得好唔好，一路都纏繞咗12個月，直至有一日我發現所有嘢 都唔係好重要，最緊要嘅係要身體好。」
阿Will隨即驚喜現身舞台，同觀眾打招呼、鞠躬致謝：「《笨蕉大劇院》好唔好睇啊？多謝你哋，多謝你哋一直嘅關心同鼓勵，唔好意思，我呢個衰仔要令大家擔心。」當聽到台下觀眾大叫「加油」，Will忍唔住講笑：「呢個咪冇睇我啲Post囉，我都話唔要聽加油㗎，我要聽嘅係咩呀？——1、2、3！」他一叫「USH」，台下即時回應：「我愛你！」氣氛溫馨感人！
阿Will續指：「我好榮幸第一個參與嘅舞台劇係同呢一班台前幕後嘅工作人員、同埋演員，一班咁正嘅人去合作，因為無論我發生咗啲小毛病之前定之後，佢哋都好照顧我，劇場真係一個魔幻嘅地方。」他向觀眾承諾：「放心，我冇事。我會照顧好自己嘅身體，然之後再喺呢度表演畀大家睇。」全場報以熱烈掌聲！佢再問觀眾：「你哋會等我㗎嘛？」聽到觀眾嘅熱情回應後，佢即擺出大心心手勢回禮！林海峰又鼓勵現場觀眾為阿Will送上祝福，阿Will攤開雙手接收觀眾窩心嘅祝福，佢之後都忍唔住掩抹眼淚，演員們亦送上擁抱，好有愛！
林海峰再補充：「大家今晚睇完之後，如果覺得有咩做得唔好嘅，例如係我做得唔好嘅 ，隨便留言，但最尾一定要寫低一句：『要身體好』。」最後，一班演員同觀眾影大合照，為首場演出畫上完美句號。
